नेपाली कांग्रेसका कास्की जिल्ला सभापति किशोरदत्त बरालले पार्टीको विशेष महाधिवेशनमा सक्रिय सहभागी हुन नेता–कार्यकर्तालाई आह्वान गरेका छन् । बिहीबार (पुस २४) एक अपिल जारी गर्दै उनले पार्टीलाई विधि र विधानानुसार अगाडि बढाउन विशेष महाधिवेशन अपरिहार्य भएको बताएका छन् ।
बराल कांग्रेस महामन्त्री विश्वप्रकाश शर्मानिकट मानिन्छन् । केन्द्रीय कार्यालयले विशेष महाधिवेशनलाई वैधानिकता नदिने र त्यसको अवज्ञा गर्न मातहतका निकायलाई ‘सर्कुलर’ जारी गरेको छ । कास्की सभापति बरालले भने महामन्त्रीद्वय गगन थापा र शर्माको कदमलाई समर्थन गरेका हुन् ।
पार्टीको १५औँ महाधिवेशन समयमा हुन नसकेको र विधान संकटमा परेको उनले उल्लेख गरेका छन् । विशेष महाधिवेशनलाई सफल बनाउन उनले सबै महाधिवेशन प्रतिनिधिलाई आग्रह गरेका छन् ।
सभापति शेरबहादुर देउवा पक्षले विशेष महाधिवेशन (कार्यक्रम)लाई पार्टी हितविपरीत भन्दै सहभागी नहुन निर्देशन दिएको छ । तर, महामन्त्रीद्वय पक्षले विधानको मर्मानुसार तोकिएको समयमा नियमित महाधिवेशन हुन नसकेकाले विशेष नै संकटमोचनको बाटो भएको जिकिर गर्दै आएको छ ।
कास्की सभापति बरालले जिल्लाका सम्पूर्ण महाधिवेशन प्रतिनिधिलाई उत्साहपूर्वक काठमाडौंमा उपस्थित हुन आह्वान गरेपछि कांग्रेसभित्रको आन्तरिक किचलो थप प्रस्ट देखिएको छ ।
