पूर्वमन्त्री तथा नेकपा (एमाले)का केन्द्रीय सदस्य राजेन्द्रकुमार राईविरुद्ध निर्वाचन आचारसंहिता उल्लंघन गरेको आरोपमा मुख्य निर्वाचन अधिकृतको कार्यालयमा उजुरी परेको छ । आगामी फागुन २१ गते हुने प्रतिनिधिसभा सदस्य निर्वाचनमा एमालेको तर्फबाट उमेदवार बनेका राईले मतदातालाई प्रभावित गर्ने गरी धनकुटाको सहिदभूमि गाउँपालिका–१, सफाइटारकी बासुरीवादक तीर्थकुमारी राईलाई नगदसहित सम्मान गरेको आरोप छ ।
उजुरीमा राईले गाउँमै पुगेर दोसल्ला ओढाएर नगद प्रदान गरेको तथा सो कार्यक्रममा गाउँपालिका अध्यक्ष मनोज राईले पनि पाँच हजार रुपैयाँ सहयोग गरेको उल्लेख छ । नेपाली कांग्रेसका जिल्ला सभापति तथा उमेदवार दिनेश राईले यस्तो कार्य आचारसंहिताविपरीत भएको भन्दै उमेदवारी खारेजीको मागसहित उजुरी दर्ता गराएका हुन् ।
उजुरीपछि मुख्य निर्वाचन अधिकृतको कार्यालयले दुवै पक्षलाई छलफलका लागि बोलाइएको कार्यालयका सूचना अधिकारी इन्द्रकुमार योङ्हाङले बताए । प्रमाणका आधारमा निर्णय गरिने र उल्लंघन पुष्टि भए उमेदवारी खारेजीसम्मको कारबाही हुन सक्ने कार्यालयले जनाएको छ ।
