काठमाडौँ महानगरपालिका भित्र बिभिन्न स्थानहरूमा अव्यवस्थित होर्डिङ बोर्ड छन् । जसले काठमाडौं महानगरलाई अत्यन्त कुरूप तुल्याइरहेको छ । व्यवसायीले शहरी सौन्दर्य बिग्रने गरि होर्डिङ राख्दा दुर्घटनाको पनि जोखिम बढेको छ ।
भवनको भुइँतलादेखि छतसम्म भरिभराउ बोर्ड झुन्डाउँदा सहरी सौन्दर्य त बिगारेको छ नै, सुरक्षामा समेत गम्भीर प्रश्न उब्जिएको छ। जथाभावी व्यवसायी परिचयपाटी होर्डिङ बोर्ड राख्दा काठमाडौं सहर निकै कुरूप बनेको सर्वसाधारण बताउँछन् ।
राजधानीका केही स्थानबाट विभिन्न बोर्ड जफत गरि टेकु स्थित प्रहरी ब्यारेकमा राखिएको छ । तर सबै स्थानमा उचित व्यवस्थापन गर्न महानगर असक्षम देखिएको छ । देशको केन्द्रबिन्दु काठमाडौंमा नै यस्तो अस्तव्यस्तता हुनु हास्यास्पद छ ।
यता महानगर प्रहरी प्रमुख धनपति सापकोटा भने व्यवसाय परिचय पाती होर्डिङ बोर्ड राख्न मिल्ने बताउँछन् । व्यवसाय गर्न स्वीकृति दिएपछि परिचयपाटी पनि राख्न दिनुपर्ने उनको भनाई छ ।
सहरी सौन्दर्य बिगार्ने विज्ञापन पाटि भने महानगरले विस्थापित गरेको छ । तर व्यवसायिक परिचय पाटी अत्याधिक हुँदा यसले निम्त्याएको समस्या ताउको दुखाईको विषय बनिरहेको छ । अव्यवस्थित होर्डिङ बोर्डलाई व्यवस्थित बनाउने उपयुक्त सूत्र खोज्न महानगरले कदम चाल्नै पर्छ ।
