बाजुराको विकट हिमाली गाउँपालिकाको बिच्छ्याकी एक सुत्केरी महिलाको हेलिकप्टरबाट उद्वार गरिएको छ । स्थानीय २३ वर्षिया कल्पना रोकायाको प्रसुति पछि उच्च रक्तस्राव भएको र प्लासेन्टा आउट समेत नभएपछि थप उपचारका लागि हेलिकप्टरबाट उद्वार गरेर सुर्खेत लगिएको हो ।
मानव विकास सुचकांकमा देशकै सबैभन्दा पछि परेको गाउँ बिच्छ्यामा टेलिफोन समेत राम्रो नलाग्ने र उद्वारका लागि प्रकृयागत झमेला भएपनि सबै सरोकारवाला निकायको पहलमा हेलिकप्टरबाट उद्वार गरेर सुत्केरीको ज्यान बचाइएको हिमाली गाउँपालिकाको स्वास्थ्य शाखा प्रमुख एवम् सूचना अधिकारी राजबहादुर भण्डारीले जानकारी दिए । उद्वार गरिएकी सुत्केरीको सुर्खेत प्रादेशिक अस्पतालमा थप उपचार भइरहेको छ ।
गर्भवती तथा सुत्केरीको आपतकालिन उद्वारका लागि उपचारमा संलग्न स्वास्थ्यकर्मीको राय बमोजिम स्थानीय सरकारको समन्वय र जिल्ला प्रशासनको सिफारिसमा राष्ट्रपति महिला उद्धार केन्द्र मार्फत हेलिकप्टर पठाएर निःशुल्क उद्वार गर्ने सरकारी नीति छ ।
तर बाजुराको बिच्छ्या जस्ता गाउँमा समस्या पर्दा सरकारी प्रकृया पुर्याउन गाह्रो हुने स्वास्थ्य शाखा प्रमुख भण्डारी बताउँछन् । `कागजात चाहिएको सबै दुर्गमता र ईन्टरनेट नहुदा पठाउन सकिदैन । उताबाट रिफर कागजात र निर्णय पठाउनु अनि हुन्छ भन्ने जवाफ आउँछ तर हामीकहाँ स्वास्थ्य संस्था बाट तुरुन्तै पठाउन सक्ने ईन्टरनेट सुबिधा नहुदा अफ्ठ्यारो हुन्छ ।´ प्रमुख भण्डारीले अनलाइन सरोकारसँग भने,`सबै प्रकृया पुरा गरेर पनि कहिलेकाहीँ मौषमको खराबीका कारण उद्वार हुन सक्दैन ।´ सरकारी प्रकृया सहज बनाए दुर्गम क्षेत्रका महिलाहरुले राष्ट्रपति महिला उद्धार सेवाबाट लाभ लिन सक्ने उनको भनाइ छ ।
बाजुराको साविकको बिच्छ्या गाविस हालको हिमाली गाउँपालिका वडानम्बर १,२ र ३ मा अहिले सम्म मोटरबाटोको पहुँचसम्म पुगेको छैन । यहाँका स्थानीय सवारी चढेर गाउँपालिका वा शहर आउन करिब ५ घण्टा पैदल यात्रा गरेर हुम्लाको ताजाकोट वा १ दिन लगाएर कुवाडी पुग्नुपर्छ ।
आधारभुत सेवाबाट समेत वञ्चित बिच्छ्याका स्थानीयले आफुहरुका दुःख धुलाचौर (गाउँपालिका), धनगढी (प्रदेश सरकार) र काठमाडौं (संघीय सरकार) ले नदेखेको गुनासो गर्ने गरेका छन् ।
विच्छ्याको विकासलाई प्राथमिकता राखेपनि स्रोत अभावले पर्याप्त हुन नसकेको हिमाली गाउँपालिका अध्यक्ष गोविन्दबहादुर मल्ल बताउँछन् ।
