धादिङको ज्वालामुखी गाउँपालिका अध्यक्ष यामनाथ दनैले उत्कृष्ट स्थानीय तह प्रमुख सम्मान पाएका छन् । नेपाली कांग्रेसले गत स्थानीय तह निर्वाचनमा कांग्रेसबाट उमेदवार भई निर्वाचित भएर उत्कृष्ट काम गरेको भन्दै अध्यक्ष दनैलाई पार्टीले सम्मान गरेको हो ।
कांग्रेसबाट निर्वाचित गाउँपालिका मध्य गतवर्षको स्थानीय सरकारको संस्थागत क्षमता स्वमूल्याङ्कनमा ८५.५ नम्बर प्राप्तगरी उत्कृष्ट स्थानीय तह बन्न सफल भएको ज्वालामुखीका अध्यक्ष दनैलाई कांग्रेस सभापति शेरबहादुर देउवाले सम्मान गरेका हुन् ।
नेपाली कांग्रेस स्थानीय तह समन्वय विभागको आयोजनामा भएको कार्यक्रममा अध्यक्ष दनैसहित आफ्नो पालिका उत्कृष्ट बनाउने विभिन्न स्थानीय तहका प्रमुखलाई सम्मान गरिएको थियो ।
पार्टीको मुल्याङ्कन र सम्मानले थप सकृय भएर जनपक्षिय काम गर्ने र पार्टी निर्माणमा लाग्ने उर्जा मिलेको अध्यक्ष दनैको भनाइ छ ।
ज्वालामुखीले समग्र विकास र समृध्दिसहित सेवा प्रवाहमा अब्बल काम गर्दै आएको छ ।
कांग्रेसले २०७९ को स्थानीय तह चुनावमा तीन सय २९ वटामा प्रमुख पद जितेको थियो । तीमध्ये उत्कृष्ट काम गरेका प्रमुखहरुलाई पार्टीले सम्मान गरेको हो ।
कांग्रेसको सम्मान कार्यक्रममा संघियता बलियो बनाउन स्थानीय तहलाई अधिकार र स्रोत सम्पन्न बनाउनुपर्नेमा जोड दिईएको थियो ।
