नेपाली कांग्रेसले स्याङ्जाको अर्जुनचौपारी गाउँपालिकाका अध्यक्ष प्रकाश तिवारीलाई सम्ममान गरेको छ । गत स्थानीय तह निर्वाचनमा कांग्रेसबाट उमेदवार भई निर्वाचित भएर उत्कृष्ट काम गरेको भन्दै पार्टीले सम्मान गरेको हो ।
कांग्रेसबाट निर्वाचित गाउँपालिका मध्य गतवर्षको स्थानीय सरकारको संस्थागत क्षमता स्वमूल्याङ्कनमा ८६.० नम्बर प्राप्तगरी पहिलो बन्न सफल भएको अर्जुनचौपारीका अध्यक्ष तिवारीलाई कांग्रेस सभापति शेरबहादुर देउवाले सम्मान गरेका हुन् ।
नेपाली कांग्रेस स्थानीय तह समन्वय विभागको आयोजनामा भएको कार्यक्रममा अध्यक्ष तिवारीसहित आफ्नो पालिका उत्कृष्ट बनाउने विभिन्न स्थानीय तहका प्रमुखलाई सम्मान गरिएको थियो ।
पार्टीको मुल्याङ्कन र सम्मानले थप सकृय भएर जनपक्षिय काम गर्ने र पार्टी निर्माणमा लाग्ने उर्जा मिलेको अध्यक्ष तिवारीको भनाइ छ ।
कांग्रेसले २०७९ को स्थानीय तह चुनावमा तीन सय २९ वटामा प्रमुख पद जितेको थियो । तीमध्ये उत्कृष्ट काम गरेका प्रमुखहरुलाई पार्टीले सम्मान गरेको हो ।
कांग्रेसको सम्मान कार्यक्रममा संघियता बलियो बनाउन स्थानीय तहलाई अधिकार र स्रोत सम्पन्न बनाउनुपर्नेमा जोड दिईएको थियो ।
