बागमती प्रदेशका मुख्यमन्त्री वहादुरसिंह लामाले राम्रो अध्ययनका साथै खेलकुदलगायत अतिरिक्त क्रियाकलापमा समेत विद्यार्थीको ध्यान जानुपर्नेमा जोड दिएका छन् । रसुवा जिल्ला खेलकुद विकास समितिद्वारा धुन्चेमा आयोजित १२औँ राष्ट्रपति रनिङशिल्ड प्रतियोगिताको उद्घाटन गर्दै मुख्यमन्त्री लामाले शारीरिक रुपमा चुस्तदुरुस्त भई सहज रुपमा काम गर्न र अन्तरराष्ट्रिय जगत्मा समेत परिचित हुन खेलकुद विधातर्फ विद्यार्थीको ध्यान जान आवश्यक रहेको बताएका हुन् ।
रसुवा जिल्लाको खेलकुद विकास तथा विस्तारमा आवश्यक बजेट विनियोजन गर्ने प्रतिबद्धता व्यक्त गर्दै उनले २०७२ को ‘गोर्खा भूकम्प’ ले क्षति पु¥याएको जिल्ला खेलकुद भवन पुनर्निर्माण गरिदिने बताए ।
ऐतिहासिक रसुवागढी नाका, लाङटाङ पर्यटकीय क्षेत्र, पवित्र तीर्थस्थल गोसाइँकुण्ड, विद्युत् उत्पादनका दृष्टिले महत्वपूर्ण जिल्लाका रुपमा परिचित रसुवा जिल्लाको समग्र विकासमा प्रदेश सरकारले सक्दो सहयोग गर्ने उल्लेख गर्दै मुख्यमन्त्री लामाले लाङटाङ राष्ट्रिय निकुञ्ज क्षेत्रको प्रवद्र्धन गर्न र वन–बनस्पति तथा वन्यजन्तुलगायत जैविक विविधताको संरक्षणमा सहकार्य गर्न तयार रहेको बताए ।
सो अवसरमा प्रतिनिधिसभाका सदस्य मोहन आचार्यले रसुवा जिल्लाको सडक–बाटो निर्माण तथा विस्तारसहित विकास निर्माणका कामलाई प्राथमिकतामा राखी आगामी वर्षको वजेट बनाउन प्रदेश सरकारको ध्यानाकर्षण गराएका छन् ।
