मधेशमा कृषि विद्युतीकरणको पहल थालिएको छ । कृषिमा आत्मनिर्भर मधेश प्रदेशका किसानले भोग्दै आएको सिंचाई समस्या समाधानका लागि प्रदेश सरकारले कृषि विद्युतीकरणको पहल थालेको हो ।
मधेशका मुख्यमन्त्री सतिशकुमार सिंह आफैंले किसान लक्षित यो कार्यको नेतृत्वदायी पहल गरेका छन् । मुख्यमन्त्री सिंहले आईतबार नेपाल विद्युत प्राधिकरण, मधेश प्रदेशका प्रमुख मोनीन्द्र ठाकुरसँग मधेश प्रदेशका आठवटै जिल्लामा कृषि विद्युतीकरणको विषयमा छलफल गरेका छन् ।
छलफलका क्रममा मुख्यमन्त्री सिंहले तत्काल प्रदेशका सबै जिल्लामा सहज रुपमा लागू हुनेगरी कृषि विद्युतीकरणको योजना लागूगर्न निर्देशन दिएका छन् ।
पछिल्लो समय तराई मधेशका जिल्लामा विद्युतबाट पानी तानेर सिंचाई गर्ने चलन बढेको छ । खेतका बीचभागमा इनार खन्ने र त्यसमा मेसिन राखेर विद्युतमार्फत जमिनमुनीको पानी
तान्ने गरिन्छ ।
व्यवस्थित कृषि विद्युतीकरणको पहल नहुँदा कतिपय ठाउँमा स्थानीयले आफुखुसी विद्युत प्रयोग गरेर सिंचाई गर्दै आएका छन् ।
पर्साको ठोरी लगायतका केही स्थानीय तहले पालिका स्तरबाटै पनि कृषि विद्युतीकरणको योजना बनाएर कार्यान्वयन सुरु गरेका छन् ।
