बाग्लुङको निसीखोला गाउँपालिकाका जनप्रतिनिधिले दुर्गम गाउँलाई सुगम बनाएका छन् । बागलुङ जिल्लाका १० स्थानीय तह मध्ये निसीखोला गाउँपालिका केही वर्षअघि सम्म निकै विकट थियो । वर्तमान जनप्रतिनिधिको सकृयताबाट भएको विकासले निसीखोला भित्रका दुर्गम गाउँहरु सुगम बनेका हुन् ।
देवीस्थान, बोहोरागाउँ, राजकुत र निसी क्षेत्रका सबै टोलबस्तिमा मोटरबाटोको पहुँच पुगेको छ । समृद्धिको मार्ग स्वरुप गाउँटोलमा पुुर्याइएका सडक सञ्जालको स्तरोन्नती गर्ने र अन्य पूर्वाधार विकासमा समेत आवधिक योजना बनाएर काम गर्ने स्थानीय तहको योजना छ ।
गाउँपालिकामा ७ वटै वडाका विद्यालयको शैक्षिक गुणस्तर र स्वास्थ्य संस्थाको सेवाको गुणस्तर बढाइएको छ ।
निसीखोलाका नागरिकको मुख्य पेशा कृषि र पशुुपालन हो । सबै वडामा पशुवस्तु चरिचरणका लागि प्रसस्तै खुला जमिन छ । खेतीपातीको सम्भावना पनि उत्तिकै छ ।
बागलुङ जिल्लामै सबैभन्दा राम्रो स्याउ उत्पादन हुने क्षेत्र निसीखोलाको वडा नम्बर ५ निसेलढोर, वडानम्बर २ को अर्नाकोट हो । निसीखोलामा वर्षौं अगाडिदेखि नै व्यावसायिक स्याउ उत्पादन हुँदै आएको छ । गाउँपालिकाले अहिले थप स्याउखेती विस्तार गरिरहेको छ ।
निसीखोला मौरीको महका लागि निकै प्रख्यात छ ।
बोयर बोका वितरण गरिरहेको निसीखोलाले गाउँलाई आलु र मासुमा आत्मनिर्भर बनाएको छ ।
दलहन र तेलहनबाली प्रसस्तै हुने यस क्षेत्रमा परम्परागत निर्वाहमुखी खेतीलाई आधुनिकिकरण गरेर व्यवसायिक बनाउन पकेट विकासका कार्यक्रम थालिएको छ ।
कृषि मार्फत नै किसानलाई आत्मनिर्भर बनाउन कृषकको उत्पादन, हातहातमा अनुदान जस्ता कार्यक्रम मार्फत कृषि र पशु पालनमा उत्पादनमा आधारित अनुदान दिने गरिएको गाउँपालिका अध्यक्ष सूर्यबहादुर घर्तीले बताए ।
बाग्लुङको निसीखोलाका सबै नागरिकको स्थानीय सरकारले निःशुल्क स्वास्थ्य बीमा गरिदिएको छ । उपचार खर्च अभाव र आधारभुत स्वास्थ्य सेवाको अभावमा रोग पालेर बस्न बाध्य यहाँका स्थानीयलाई वर्तमान जनप्रतिनिधिले पदभार ग्रहण गरेलगत्तै बीमाका कार्यक्रम मार्फत निःशुल्क स्वास्थ्य बीमा गरिदिएर उपचारमा सहजता ल्याइदिएका छन् । गतवर्ष बीमा गर्न छुटेकाहरुका लागि यसवर्ष २ करोड बजेटबाट बीमा गराउने काम भइरहेको छ ।
वडा वडामा स्रोत साधन सम्पन्न स्वास्थ्य चौकी व्यवस्थापन र लेबाङ जस्ता टाढाका टोलबस्तिमा स्वास्थ्य इकाइ स्थापना तथा शिविर सञ्चान गरेर सेवा दिइरहेको निसीखोलाले पोषणका कार्यक्रम सञ्चालन गरिरहेको छ ।
बाग्लुङ जिल्लामै सबैभन्दा बढी सुत्केरी हुने स्वास्थ्य संस्थाका रूपमा चिनिएको निसीखोला गाउँपालिका–३ स्थित बोहोरागाउँ स्वास्थ्य संस्थामा निसीखोला गाउँपालिका र ग्रामीण स्वास्थ्य सुधार परियोजनाको सहयोगमा प्रसूति प्रतिक्षा घर निर्माण गरिएको छ । भान्साघर र सुत्ने ठाउँसहितको प्रसूति प्रतिक्षा घरले गर्भवतीलाई खर्च र जोखिम दुवै कम गराएको छ । यहाँ वार्षिक करिब डेढसय जनाले प्रसुति सेवा लिने गरेका छन् ।
यसक्षेत्रमा विगतमा खानेपानीको निकै समस्या थियो । नेवा सँगको साझेदारीमा पालिकाले मुहान देखि चुहानसम्म दिगो हुनेगरी खानेपानी आयोजना सञ्चानल गरेर नागरिकलाई स्वच्छ पानी खुवाएको छ ।
गाउँमै लघुजलविद्युत आयोजना सञ्चालन गरेर विद्युतीकरण गरिएको निसीखोलामा केन्द्रिय विद्युत विस्तारको काम धमाधम भईरहेको छ ।
अधुरा योजनाहरु सम्पन्न हुने चरणमा छन् भने नयाँ दिर्घकालिन विकासका अवधारणाहरु अघि बढेका छन् ।
निसीखोला पर्यटनको प्रचुर सम्भावना भएको क्षेत्र हो । ग्रामिण क्षेत्रमा घुम्न र रम्न चाहनेलाई स्थानीय उत्पादनका अर्गानिक परिवारको स्वाद चाख्दै आँखै अगाडी देखिने सुन्दर हिमश्रङ्खला, डाँडापाखा, भञ्ज्याङ चौतारी, छाँगाछहराजस्ता मनोरम एवं रमणियस्थलहरु हेर्न र चुम्न पाइन्छ ।
पर्यटन प्रवद्र्धनका लागि डिपिआर बनाएर पूर्वाधार विकास र प्रचारप्रसार गर्दै आन्तरिक तथा बाह्य पर्यटकको आवागमन बढाउन नर्सिङकोटमा केबुलकार राख्ने, पालिका स्तरीय खेलमैदान बनाउने, पर्यटकीय पैदलमार्ग बनाएर स्थानीय पर्यटकीय गन्तव्यको प्रवद्र्धन गर्ने योजना छ ।
पुरानो किंवदन्ती बोकेको राजारानी पुतलीद्धारा जस्ता थुप्रै इतिहासहरु यसक्षेत्रमा छन् । राज्य एकिकरणको सन्दर्भ जोडिने यसक्षेत्रमा त्यो बेला देखिनै मागेसंक्रान्तिमा मेल महोत्सव आयोजना हुँदै आएको छ । आधुनिकताको विकाससँगै परम्पराको संरक्षणमा जुटेको निसीखोलाले युवा क्लवका माध्यमबाट कला संस्कृति र खेलकुदको संरक्षण एवं जगेर्ना गरिरहेको छ ।
सामाजिक गतिविधिमा युवालाई अगुवा बनाएको यो गाउँपालिकाले युवालाई आत्मनिर्भर बनाउने नीति कार्यक्रम सञ्चालन गरिरहेको छ ।
यहाँ लक्षित वर्ग विशेष कार्यक्रमहरु सञ्चालनमा छन् । सिपमुलक तालिम कार्यक्रम उत्पादन र आत्मनिर्भतामा केन्द्रित छन् ।
कुरिति, विशंगती र छुवाछुत जस्ता सामाजिक रुपमा निन्दनीय र कानुनी रुपमा दण्डनिय कार्यहरु निस्तेजको अभियान चलिरहेको छ । सहारा विहिनले साथ मात्रै पाइरहेका छैनन् अन्यायमा परेका न्यायिक समिति मार्फत न्याय समेत पाएका छन् ।
सचेतनाको विकासमा जोड दिएको यो गाउँपालिकाले महिला हक अधिकारका पक्षमा अभियानात्मक कार्यक्रम गर्दै आएको छ ।
सुशासन र पारदर्शीताका सवालमा उत्कृष्ट काम गर्दै आएको निसीखोलाले सार्वजनिक सेवा प्रवाहलाई गुनासो रहित बनाइएको छ ।
आन्तरित स्रोत नभएको निसीखोलाले सिमित स्रोतबाट नागरिकका असिमित माग र आवश्यकता पुरा गरिरहेको छ । जनताका माग बोकेर यहाँका जनप्रतिनिधि माथिल्ला सरकारका ढोका ढकढकाउन पुगरिहेका छन् ।
निर्वाचित भएको पहिलो २ वर्ष जनपक्षिय काम गरेका निसीखोलाका जनप्रतिनिधि बाँकी कार्यकालको ३ वर्ष पनि रचनात्मक काम गर्ने योेजनामा छन् ।
