हुम्लाको ताँजाकोट क्षेत्रका किसानलाई आफ्नो बारीमा फलेको अन्नले वर्षभरि खान पुग्दैन । यद्यपी यहाँका स्थानीयको जीवन निर्वाहको मुख्य आधार नै कृषि र पशुपालन हो ।
अन्य आयस्रोतको माध्यम नभएपछि ताँजाकोटका किसानले पुख्र्यौली पेशा कृषि त्यो पनि निर्वाहमुखी तरिकाले गरिरहेका छन् र जसोतसो खेतीपातीबाटै उब्जाउ भएको अन्नले छाकटारिरहेका छन् ।
पुस्तौं पुस्ता देखिको यो अवस्थालाई सुधार गर्न यहाँको स्थानीय तहले नीतिगत पहल थालेको छ ।
ताजाँकोट गाउँपालिकाले व्यवसायिक कृषि मार्फत किसानलाई आत्मनिर्भर बनाउने योजना अघि सारेको हो ।
रैथानेबालीको संरक्षण गर्दै आधुनिक कृषि प्रणालीमा किसानलाई आकर्षित गराएर खुर्सानी, स्याउ, दन्तेओखर, किबी, अनार, केरा र कागतीजस्ता फलफुल, तरकारी र बजारमा महंगोमा विक्रिहुने अन्नबाली पकेट विस्तार गरेर व्यवसायिक कृषि कार्यक्रम सञ्चालन गर्न र गाउँको उत्पादन शहरमा लगेर बेच्न समेत पालिकाले नै सहजिकरण गर्न थालेको गाउँपालिका अध्यक्ष लालकेश जैसीले बताए । किसानले उत्पादन गरेको कृषि उपज गाउँपालिकाले नै किन्ने वा गाउँबाट किनेर शहरमा लैजाने व्यापारीलाई पालिकाले ढुवानी भाडा दिने समेतको नीति ल्याइएको छ ।
रैथानेबालीको बिउ संरक्षण, आधुनिक खेती विस्तार र उत्पादित कृषि उपजको बजारीकरण गरेर खेतीपातीबाटै आम्दानीको स्रोत बढाउने र आत्मनिर्भर बनाउने बाटो देखाएपछि यहाँका किसान दंग परेका छन् ।
ताँजाकोटमा पोषण तथा खाद्य सुरक्षा सुनिश्चितताका लागि हरेक वडामा रैथानेवाली प्रवद्र्धनका लागि एक घर एक करेसाबारी सामुहिक तरकारी खेती फलफुल खेती र विद्यालय नर्सरी तथा करेसाबारी कार्यक्रम सञ्चालनमा छ । ताँजाकोट भ्रमण गर्ने पर्यटकलाई स्थानीय उत्पादनको परिवार खुवाउने गरिन्छ ।
ताँजाकोटको समृद्धिको आधार नै कृषि र पशुपालन हो । पालिकाले अघि सारेको नीति कार्यक्रम अनुसार काम हुन सके यहाँका किसानले कृषि र पशुपालनबाटै मनग्य आम्दानी गर्नेछन् ।
