रामेछापको मन्थली नगरपालिकाले स्थानीय पाठ्यक्रम तयार पारेको छ । नगरपालिका क्षेत्रभित्रका समग्र विषयलाई समेटेर नगरपालिकाले स्थानीय पाठ्यक्रम तयार गरेको हो ।
मन्थली नगरपालिका भित्रको ऐेतिहासिक तथा पर्टकीय स्थल, पहिचान, सामाजिक, धार्मिक एवम् सांस्कृतिक विषयहरु समावेस गरेर स्थानीय पाठ्यक्रम तयार पारिएको नगरपालिकाको शिक्षा शाखा प्रमुख हेमन्त बुढाथोकीले जानकारी दिए । पाठ्यक्रमले निर्धारण गरेका उद्देश्य अनुरुप ‘हाम्रो मन्थली’ नामको पुस्तक प्रकाशन गरेर चालु शैक्षिक सत्र देखिनै लागु गरिएको छ ।
स्थानीय पाठ्यपुस्तक नगरपालिकाले नगरभित्रका सबै सामुदायिक तथा निजी विद्यालयलाई उपलब्ध गराउने भएको छ । चालु शैक्षिक सत्रमा कक्षा १ देखि ५ सम्मका विध्यार्थीका लागि तयार पारिएको पाठ्यक्रम ६७ वटा सामुदायिक विद्यालय तथा ६ वटा निजी विद्यालयलाई उपलब्ध गराउने नगरपालिकाको तयारी छ ।
नगरपालिकाले तयार पारेको पाठ्यक्रम विद्यालयलाई उपलब्ध गराउने र विद्यालय मार्फत शिक्षकलाई तालिम समेत दिएर दैनिक एक विषय स्थानीय पाठ्यपुस्तक मार्फत अध्ययान अध्ययापन हुने मन्थली नगरपालिकाका प्रमुख रमेश बस्नेतले बताए । नगरपालिकाका सबै पदाधिकारीको राय र सरोकारवाला तथा विशेषज्ञहरूको सुझाव अनुसार विषयवस्तु छनोट गरेर पाठ्यक्रम लागु गरिएकाले प्रभावकारी हुनेमा आफुहरु विश्वस्त रहेको उनको भनाई छ ।
स्थानीय विषयवस्तु समावेश गरिएको ‘हाम्रो मन्थली’ पुस्तक ६० पेजको छ । उक्त पुस्तकमा ९ वटा विषय समावेश गरिएको छ । नागरिक तथा नैतिक शिक्षा, कृषि, व्यक्तिगत तथा सार्वजनिक सुरक्षा, विपद व्यवस्थापन लगायतका विषय पनि पाठ्यक्रममा समेटिएको छ ।
राष्ट्रिय पाठ्यक्रम प्रारुपले आधरभूत तहमा एक विषयको स्थानीय पाठ्यक्रम स्थानीय तहले तयार गरी पठनपाठन गराउनुपर्ने ब्यवस्था छ । तर देशका अधिकांश स्थानीय तहले अझै पनि पाठ्यक्रम तयार गरेका छैनन् ।
