ओखलढुंगा । ओखलढुंगाको च्यानममा नमुना बस्ति बनाउन सरोकार समिति गठन गरिएको छ । दाताले दिएको जग्गामा बस्ति बसाएर पहिरोको जोखिममा रहेकालाई सुरक्षित स्थानमा सार्ने योजना अनुसार नमुना बस्ति बसाउन सरोकार समिति गठन गरिएको हो ।
स्थानीय युवा समाजसेवी सन्तोषकुमार बस्नेतले सुनकोशी गाउँपालिका ८ आम्बोटेमा ५ रोपनी जग्गा रजिष्ट्रेसन पास गरेर नमुना बस्ति बनाउन दिएका थिए । उक्त जग्गामा बस्ति बसाएर सुनकोशी ८ भोटेबारीका पहिरोको जोखिममा रहेका २० घर दलित समुदायलाई त्यहाँ सार्ने योजना थियो । जग्गाको लालपुर्जा हस्तान्तरण कार्यक्रममा संघिय तथा सांसद, स्थानीय तहका जनप्रतिनिधि लगायतका सरोकारवालाले तत्काल प्रकृया अघि बढाउने आश्वासन दिएका थिए । अहिले सम्म कुनै काम नभएको स्थानीय निर्मला नेपालीले बताईन् । उनले भनिन् ‘जग्गा पायौं दातासँग खुसी छौं । आश्वासन मात्रै पायौं नेतासँग दुःखी छौं ।’ वर्षाको समय अगावै बस्ति स्थानान्तरण गरिदिन जोखिमयुक्त क्षेत्रका नागरिकको माग छ ।
दाताले जग्गा निःशुल्क उपलब्ध गराएको लामो समय सम्म नमुना बस्तिको काम अघि नबढेपछि पैरविका लागि सरोकार समिति बनाईएको छ । छत्रबहादुर बस्नेतको अध्यक्षमा गठित समितिको सचिवमा दिलबहादुर दर्जी, कोषाध्यक्षमा तुलसी कुमारी श्रेष्ठ, सदस्यहरु ओमकुमारी दर्जी, कुमारी विश्वकर्मा, वृखबहादुर मगर, अमृत बस्नेत, नविक श्रेष्ठ, नैनकला बस्नेत छन् । यो समितिले च्यानममा नमुना बस्ति निर्माण र जोखिमयुक्त बस्ति स्थानान्तरणमा सरकार र सरोकारवालासँग समन्वय सहितको आवश्यक भूमिका खेल्ने जनाईएको छ ।
