अनलाईन सरोकार
काठमाडाैं- सरकारको वार्षिक नीति तथा कार्यक्रम पारित भएकाे छ । प्रतिनिधिसभाको मंगलबारको बैठकले आर्थिक वर्ष ०७७–७८ का लागि सरकारले ल्याएको नीति तथा कार्यक्रम बहुमतले पारित गरेको हाे ।
राष्ट्रपति विद्यादेवी भण्डारीले यही २ जेठमा संसद्को दुवै सदनको संयुक्त बैठकमा सरकारको वार्षिक नीति तथा कार्यक्रम प्रस्तुत गरेकी थिइन् ।
नीति तथा कार्यक्रममाथिको छलफलमा प्रतिनिधिसभाका सांसदहरूले आ–आफ्नो धारणा राखेका थिए ।
प्रधानमन्त्री केपी शर्मा ओलीले संसदमा सांसदहरूले उठाएका प्रश्नको जवाफ दिएका थिए ।
नीति तथा कार्यक्रममाथि सांसदहरू डा. मीनेन्द्रप्रसाद रिजाल, दुर्गा पौडेल, प्रेम सुवाल, लक्ष्मणलाल कर्ण र सरिता गिरीले संशोधन प्रस्ताव राखेका थिए ।
सभामुख अग्निप्रसाद सापकोटाले संशोधन प्रस्ताव फिर्ता लिन सांसदहरूलाई समय दिएको र उनीहरूले फिर्ता लिन अस्वीकार गरेपछि निर्णयार्थ प्रस्तुत गरिएको थियो ।
संसद्को बहुमतले सरकारको नीति तथा कार्यक्रम पारित गरेको हो ।
प्रतिनिधिसभाको अर्काे बैठक यही १३ जेठमा दिउँसो १ः०० बजे बस्ने संसद् सचिवालयले जनाएको छ ।
