बागलुङको जैमिनी नगरपालिकाले लिड स्कुलको अवधारणा ल्याएको छ । सामुदायिक विद्यालयको शिक्षामा नयाँ आयाम सिर्जना गर्नेगरी जैमिनीले देशमै नयाँ सन्देश दिनेगरी लिड स्कुलको अवधारणा ल्याएको हो ।
एउटा वडामा व्यवस्थित एउटा मात्रै विद्यालय सञ्चालन गर्ने, विद्यालयलाई उत्पादनसँग जोड्ने, विद्यार्थीलाई पढाइसँगै सीपमुलक कार्यमा अभ्यस्त बनाउने, उद्यमी अभिभावक छनोट गर्ने, प्रत्येक विद्यालयका २ जना सफल उद्यमीलाई पुरस्कृत गर्ने, उद्यमशिलता विकास गर्ने, शिक्षक, अभिभावक र विद्यार्थीलाई विद्यालयमा आवासीय सुविधा दिने र विद्यालय मार्फत कृषि उत्पादनमा लगाइने नगरप्रमुख नरबहादुर पुनले बताए । लिड विद्यालयको अवधारणा पुराहुन केही समय लागेपनि विदेशीने युवालाई देशमै स्वरोजगार बनाउन र बालबालिकाको शिक्षाका लागि अभिभावक गाउँछाडेर शहर पस्ने बाध्यकारी अवस्था सुधार हुने नगरप्रमुख पुनको भनाई छ । उनका अनुसार वडा नम्बर ५ मा लिड विद्यालय छनोट गरेर काम सुरु गरिएको छ ।
जैमिनीले चालु आवमा एक विद्यालय एक उत्पादन, प्राविधिक शिक्षाको विस्तार र विकास, आवाशिय लिडस्कुल सञ्चालन, पाहुना शिक्षक परिचालनसहितका महत्वकांक्षी योजनामा बजेट विनियोजन गरेको छ ।
