काठमाडौं । अखिल नेपाल फुटबल संघ (एन्फा) ले नेपाली राष्ट्रिय पुरुष फुटबल टोलीका ११ खेलाडीसहित२५ जनाको स्वाब संकलन गरेको छ । सोमबार पाटन अस्पतालमा ११ खेलाडी, दुई अफिसियल र १२ जना स्टाफ गरि २५ जनाको स्वाब संकलन गरिएको एन्फाले जनाएको छ । बाँकी खेलाडी र अरु स्टाफको मंगलबार स्वाब संकलन गरिने एन्फाले जनाएको छ ।
सोमबार उपत्यका बाहिरबाट आएका विशाल राई, देवेन्द्र तामाङ, रवि पासवान, रन्जित धिमाल, मिक्छेन तामाङ, पुजन उपरकोटी, विमल राना, दीप कार्की, छिरिङ गुरुङ, दिलेन लोक्ताम र दर्शन गुरुङको तथा फिजियो आविस्कार पुडासैनी र प्रशिक्षक किरण श्रेष्ठको स्वाव संकलन गरिएको छ ।
एन्फाले क्याम्पमा डाकिएका ३४ खेलाडीसँगै कोचिङ स्टाफ, अफिसियल, होस्टेल स्टाफलगायत ७० जनाको कोरोना परीक्षण गरिने योजना बनाएको छ ।
